FA Sápmi vuoruha nuorra rávisolbmuid ja vásihii historjjálaš dáhpáhusa Fearasulluin

FA Sápmi lea aiddo čálihan iežas historjágirjjiide go fitne Fearasulluin spáppačiekčat. Lea namalassii vuosttaš háve ahte ConIFA-joavku (Confederation of Independent Football Associations) čiekčá FIFA-joavkku vuostá.

– Dát vulggii das go eat lean ožžon iežamet spábbačiekčanbiktasiid diibmá Pite Summer Games:i. Min bivttassponsor bođii Dánmárkkus girdin biktasiin ja muitali ahte sáhti šiehtat čiekčamiid Fearasullo spábbačiekčanjoavkkuid vuostá. Dasa mii gal mieđaimet, muitala Håkan Kuorak, FA Sápmi presideanta.

Čikče hui bures ja buoridedje bohtosiid

Ođđajagimánu loahpas vulge FA Sápmi N19 ja G19 Torshavnii Fearasullus. Ledje gergosat sihke hárjehallat ja kámppaid čiekčat Tórsvøllur stadionas.

– In jáhke oktage mis lei nagodan govahallat ahte nu unna báikkis go Torshavnas lea nu stuorra stádion, dadjá Victoria Haukebø, N19-joavkku kapteaidna. Son lea ovdal leamaš FA Sámiin Kanadas, Alaskas ja Bihtámis. Dábálaččat son čiekčá Medkila IL ovddas Hársttákas.

– Earret hárjehallamat, mii čievččaimet gukti Fearasullo vuostá. Vuosttaš čiekčamat ii mannan nu bures. Mii eat leat čiekčan olu fárrolaga ja dárbbašeimmet áiggi oahpásnuvvat guhtet guoibmámet. Dan mii nagodeimmet jo nuppi čiekčamis šattai buoret boađus. Mu mielas lei erenoamáš somá oaidnit joavkko ovdáneami. Mii barggaime oktavuođain sihke sihke spábbačiekčanšiljus ja muđui ge, ja dát oidnui bohtosiin, son muitala

Maiddái G19-joavkkus ledje unnán hárjehallamat ovdal čiekčamiid Fearsulluin.

– Vuosttaš čiekčamis lei veahá moivi, eai lean eará vuordámušat go mii orrut bieđggus, eat ge čievčča ovttas beaivválaččat. Muhto meinnestuvai mealgat buoret nuppi čiekčamis Havnar Bóltfelag vuostá. Dalle manai measta buot nu mo galggai, muitala Hans Ailo Siri, gii lea Ráissas eret, muhto dábálaččat čiekčá FK Vidar ovddas Stavangeris. Son lea maid leamaš Kanadas ja Bihtámis FA Sámiin.

Joavkohárjeheaddjit John Magne Vesterheim (N19) ja Odd Gunnar Lorentzen (G19) leaba duhtavačča joavkkuid olahusaiguin. Čiekčiin ii leat vejolašvuohta čiekčat ovttas beaivvalaččat go  sihke davvi- ja lulli Norggas ja Ruotas.

– Ovtta Fearasullo joavkkus ledje golbma čiekčit geat čikčet riikkajoavkkus, dasa lassin leat maid kvalifiserejuvvon UEAFA Youth League:i. Min joavkkut leat čájehan ahte sii leat mearihis čeahpit heivehit iežaset, sii ovttasbarget ja čikčet bures, muitaleaba hárjeheaddji guovttis.

Bidjat fámuid nuorra rávisolbmuid ovdii

Lea vuosttaš háve FA Sámis lea vuollel 19 jahkášaš joavkkut. Lea álkes čilgehus manne mearriduvvui dan ásahit.

– Máhcaheamit čájehedje ahte lei stuorra gaska gaskal vuollel 16 jahkášaš joavkkuid ja nisson-/dievdojoavkkuin. Go álggaheimmet vuollel 19 jahkášas joavkkuin, de sáhtiimet unnidit dán gaskka ja fállat nuorra rávisolbmuide vejolašvuođa joatkit spáppačiekčat sámileavggain rattis dassái sii válddet lávkki riikajovkui, muitala Odd Gunnar Lorentzen, G19-joavkku hárjeheaddji.

– Go mátkkošta FA Sámiin de ii leat dušše spábbačiekčamis sáhka. Lea maiddá arena gos beassá gávdnat ja bisuhit iežas identitehta kultuvrra ja oktavuođaid bokte, muitala John Magne Vesterheim, N19-joavkku hárjeheaddji.

Victoria ja Hans Ailo muitaleaba ahte sudnuide mearkkaša hui ollu beassat čiekčat FA Sápmi ovddas. Sudno mielas lea maid hui buorre ahte beassaba guhkit čiekčat joavkku ovddas.

– Mus lea stuorra sámi bearaš, ja munnje lea stuorra ášši beassat spáppačiekčat sámileavggain vel rattis. Ii dušše munnje, muhto maiddá mu bearrašii ja eará sápmelaččaide, loahpaha Hans Ailo Siri.