Bohtosat guovtti vuosttaš NC-gilvvuin heargevuoddjimis
Dán jagáš NC-gilvvuin heargevuoddjimis leat dál guokte vuosttaš cuppagilvvut čađahuvvon Sápmi Gilvopárkkas Guovdageainnus. Vuosttaš gilvu lágiduvvui maŋŋebárgga njukčamánu 24. beaivvi, ja nubbi gilvu ges gaskavahkku njukčamánu 25. beaivvi.
Seniorklássas vuittii Nástecuovvat, eaiggát ja vuoddji lea Biret Julianna Hætta, vuosttaš cuppagilvvu. Nubbin bođii Mainoo ja goalmmanin Duolvamuosetcuovvat. Nuppi cuppagilvvus lei Duolvamuosetcuovvat mii vuittii, ovdal Nástegállu ja Joker. Guovtti cuppagilvvu maŋŋel jođiha Duolvamuosetcuovvat oktiibuot 30 čuoggán, nubbin lea Nástegállu 27 čuoggán ja goalmmanin Flash 25 čuoggán.
Juniorklássas vuittii Zorro vuosttaš cuppagilvvu, nubbi lei Muohtacalbmi ja goalmman Glimt. Nuppi cuppagilvvus vuittii Tutti, nubbin bođii Glimt ja goalmmanin Turbo. Guovtti cuppagilvvu maŋŋel lea áivan dássit njunušsajis, gos Tutti, Zorro ja Glimt buohkain leat 29 čuoggát.
Dál leat vel golbma gilvvu báhcán:
-
Vuossárgga njukčamánu 30. beaivvi Sápmi Gilvopárkkas, Guovdageainnus.
-
Duorastaga cuoŋománu 2. beaivvi Niitoguolbba stadionas Kárášjogas. Dát lea maiddái NM-kvalifisering Romssa 2027 NM-gilvvuide.
-
Cuoŋománu 11. beaivvi lágiduvvojit NC-finálat heargegilvovuoddjimis Sápmi Gilvopárkkas, Guovdageainnus.