Vuosttaš muohttagis
SVN čuoiganhárjehallan Ylläsis lágiduvvui 24.-27.11. Oktiibuot 120 oasseváldi iešguđetge joavkkuin sihke Norggas, Suomas ja Ruoŧas ledje boahtán čuoiganhárjehallamii. Oasseváldit besse čuoigat juohke beaivvi fiinna láhtuid alde ja juohke hárjehallanjoavku finai geahččaleamen iežaset njoarostan dáidduid.
Johanne Ims, Fjell Skilag. Skábmadeaivvadeamis Ylläs 2022. Foto govven Aslak Mikal Mienna
Johanne Ims lea 14 jahkásaš Fjell skilag čuoigi. Son oassálasttii geahččalangilvui, mii lágiduvvui lávvardatiđida. Ovdal gilvvu son lei veahá balus ahte šaddá hui lossat čuoigat gilvvu danin go son ii leat vel beassan čuoigat muohttaga alde ovdal dán vahkkoloahpa. Maŋŋá gilvvu son lei duhtavaš iežas čuoigamiin: “Dat manai áibbas bures. Dovden ahte ii lean áibbas kontrolla, ožžon vel suotnageasáhaga gaskan gilvvu. Lei suddu go eat beassan njoarostit gilvvus, daningo ii lean buorre sadji njoarostanšilljui lahtuid bálddas gos mii čuoiggaimet. Mun lean oalle čeahppi njoarostit ja liikon dasa.” Johanne lea ožžon saji čuoigat Team Sápmi ovddas Arctic Winter Gamesas, mii boahtte jagi lágiduvvo Kanadas, Wood Buffalos
Lemet Solbakk, Deanu searat. Skábmadeaivvadeamis Snøsamling Ylläs 2022. Foto govven Aslak Mikal Mienna
Čavčča vuosttaš muohttagis čuoiggadeame
12 jahkásaš Lemet Solbakk Deanu Searain maid lei boahtán eatnis mielde Ylläsii. Lávvardaga gilvu lea su vuosttaš čuoigangilvu dán dálvái: “Mun lean veahá speanta čuoigat. Mun dieđán dáppe lea okta Iver (Innstranda IL čuoigi), gii lea hui falli. Mu taktihkka odne lea čuoigat veahá gulul álggos ja de lasihan fártta.” Lemeha eadni Katrine Trane Nilsen leamaš hui duhtavaš hárjehallanleairrain: “Dáppe lea álohii nu somá. Mii beassat ovttastallat earáiguin, borrat buori biepmu ja hárjehallat. Mu mielas lea buorre go juo leat sámi doalut, ahte sámegiella gullo ja lea oidnosis. Lágideaddjit leat hui čeahpit dasa, ahte diehtojuohkin ja gulahallan lea álohii maiddái sámegillii. Dan maid mun váillahan lea ahte galggašeimmet oažžut eanet Suoma ja Ruoŧa beale sápmelaččaid fárrui deike. Sávvamis boahtte áiggis sii maid servet dáid doaluide.”
SVN doaimmaid jođiheaddji Aslak Mikal Mienna dadjá ahte lei hui somás ja buorre hárjehallanvahkkoloahppa: “Ylläsis lei uhcán muohta, muhto lei dan veardde ahte nagodeimmet čađahit hárjehallamiid. Mii balaimet go lei uhcán muohta ahte eat beasa čuoigat obanassiige. Mun jáhkán buohkat šadde movtta go lei aŋkke doarvái muohta, dan mađe ahte oasseváldit besse hárjehallat čuoigat, ja dasa lassin vel nagodeimmet lágidit čuoigangilvvu. Orrunbáiki dáppe lea vuogas, láhtut leat lahka, buorre borramuš ja olbmot leat movttegat. Maid vel eará sáhttá vuordit.” dadjá duđavaš hárjehallama váldolágideaddji.
SVN lágida dakkáraš hárjehallandeaivvadeami jahkásaččat, de buot miellahtujoavkkut bovdejuvvojit ja sáhttet searvat. Jahkásaččat lágiduvvojit guokte deaivvadeami, okta nu mot dát muohttagis, skábmamánu ja nubbi fas árabut čakčat sullii borgemánu/čakčamánu, lea hárjehallan bievlan.
Dá dán čavčča 2022 bievlahárjehallandeaivvadeami prográmma ja dá fas skábmadeaivvadeami 2022 prográmma.
Johanne Ims Snøsamling Skábamdeaivvadeapmi Ylläs. Foto govven Aslak Mikal Mienna
Lemet Solbakk, Deanu searat. Skábmadeaivvadeamis Snøsamling Ylläs 2022. Foto govven Aslak Mikal Mienna